សេចក្តីប្រកាសព័ត៌មាន ស្តីពី កិច្ចប្រជុំបូកសរុបលទ្ធផលការងារប្រមូលចំណូលពន្ធប្រចាំខែធ្នូ និងប្រចាំឆ្នាំ២០២២ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារសម្រាប់ឆ្នាំ២០២៣
នៅថ្ងៃទី៣១ ខែមករា ឆ្នាំ២០២៣ អគ្គនាយកដ្ឋានពន្ធដារ បានរៀបចំកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ និងឆ្នាំ២០២២ ព្រមទាំងទិសដៅសម្រាប់អនុវត្តបន្តរបស់អគ្គនាយកដ្ឋានពន្ធដារសម្រាប់ឆ្នាំ២០២៣។ តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ លទ្ធផលប្រមូលពន្ធក្នុងខែធ្នូ ឆ្នាំ២០២២ មានចំនួន ៩៧៥,៤៦ ប៊ីលានរៀល (ប្រមាណជា ២៤០,៨៥ លានដុល្លារ) ស្មើនឹង ៨.៥៤% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។ សរុបរយៈពេល ១២ខែ ឆ្នាំ២០២២ ចំណូលពន្ធ-អាករ ប្រមូលបានជាក់ស្តែងមានចំនួន ១៣៩៩៣,២០ ប៊ីលានរៀល (ប្រមាណជា ៣៤៥៥,១១ លានដុល្លារ) ស្មើនឹង ១២២.៥៤% នៃផែនការច្បាប់ស្តីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២២ ធៀបនឹងចំណូលពន្ធ-អាករក្នុងរយៈពេលដូចគ្នាឆ្នាំ២០២១ ឃើញថាកើនឡើងចំនួន ២ ៧០២,៧៣ ប៊ីលានរៀល (ប្រមាណជា ៦៦៧,៣៤ លានដុល្លារ) ស្មើនឹង ២៣.៩៦%។ ក្រៅពីលទ្ធផលប្រមូលចំណូលពន្ធ នៅមានលទ្ធផលការងារសំខាន់ៗជាច្រើនទៀតដែលអគ្គនាយកដ្ឋានពន្ធដារសម្រេចបានក្នុងឆ្នាំ២០២២។
ជាទិសដៅអនុវត្តបន្តសម្រាប់ឆ្នាំ២០២៣ អគ្គនាយកដ្ឋានពន្ធដារ បានប្តេជ្ញាយ៉ាងមុតមាំ និងខិតខំប្រឹងប្រែងក្នុងការងារគ្រប់គ្រងប្រមូលចំណូលពន្ធឱ្យបានគ្រប់តាមផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ចំនួន ១៤៦៤៥,៣៨ ប៊ីលានរៀល (ប្រមាណ ៣ ៥៧១,៦៩ លានដុល្លារ) ដោយបន្តពង្រឹងការអនុវត្តនូវវិធានការ និងគោលនយោបាយសារពើពន្ធ ដែលរួមមានវិធានការសំខាន់ៗជាច្រើនទៀត។
អគ្គនាយកដ្ឋានពន្ធដារ
